Tgei munta la noziun "diaspora"?
Ella ei la denominaziun per in territori sin il qual commembers dad ina cumminonza religiusa vivan spatitschai e sco minoritad religiusa. El territori romontsch dalla Cadi tradiziunala catolica - "casa dei" - che munta casa da Diu e ch'ei la veglia denominaziun per il circuit da Mustér che cumpeglia las pleivs da Breil entochen Tujetsch, essan nus evangelic - reformai ella diaspora.
Esser part dad ina minoritad resentan biars sco difficultus ni schizun disavantagius. Franc ei l'expensa pli gronda per visitar in survetsch divin ni in arranschament: Il viadi, il temps, ils mieds da transport, la survigilonza dils affons etc. ston vegni ponderai ed organisai. Forsa che gest quels motivs procuran per ina nova schientscha: La communitad vegn resentida pli intensiva. Nus selegrein dad entupar glieud ch'ei medemamein alla tscherca. Nus acceptein las expensas perquei che nus essan pertscharts ch'ina pleiv da diaspora sa mo surviver sch'ils commembers s'engaschan per ella.
La situaziun da diaspora porta denton era schanzas specialas. Ella envida a schurmegiar l'atgna identitad culturala e religiusa denton era a s'approximar alla maioritad cun in'aviartadad activa. Ella fundaziun "Tür auf - mo vinavon" ch'ei vegnida fundada igl onn 1991 entras nossa pleiv encurin nus il dialog constructiv cun pleivs catolicas per promover la capientscha vicendeivla. La collaboraziun duei slargar ils cunfins denter las confessiuns e rinforzar il communabel respectond quei ch'ei different. Cunzun famiglias ch'ein ligiadas confessiunalmein - denton buca mo lezzas - ein dependentas d'ina megliera capientscha bilaterala. In'impurtonta part dalla collaboraziun ecumena fuorma la lavur cun affons e giuvenils. Purschidas da scolaziun e sentupada duein gidar ad enrihir la veta culturala dalla Cadi.
Esser part d'ina pleiv da diaspora vul pia insumma buca dir esser el disavantatg. Las portas vegnan aviartas per ina buna capientscha e convivenza cristiana da carstgauns da differentas confessiuns.
Bugen envidein nus Vus a purtar e crear cun nus nossa pleiv ella diaspora. Tier nossa pleiv s'audan las vischnauncas da Tujetsch, Mustér, Medel, Sumvitg, Trun, Schlans e Breil.